氣憤

kubesmile

小弟今晚到太子某間上樓珊瑚舖(太XX水族X)買咗兩件角珊瑚，回家發現其中一件鹰爪(價值480元) 背面有一半面積枯萎，後來以whatsapp形式向該店老闆講述情况，以下是我們嘅對話：

我:老细有冇攪錯，啱啱買支鷹爪燒咗 (附傳送圖片)

太: 大哥，呢啲唔係叫燒喎，燒係雪白色，係大自然枯萎，佢壓住生長引致，你係          咪初玩？啲邊全部埋晒口，唔係我個缸燒㗎。

(咪玩喇，我玩角雖然時間短，一年左右，但幫襯你都有八、九個月而花費保守估計冇一萬都有八千喇。雖然我唔識用枯字代替燒字，但我想表達係個背面點解咁？)

我:我知，但如果係你會不會揀一件有缺陷嘅角呢，玩角嘅人會不會浄係放一面呢？你又會不會放呢面俾人睇呢？如果呢件係二百元我冇話好講，又或者買家買嘅時候你會講聲呢？ (因為枯咗咁大面積，個人覺得如果賣出價錢應相對調低)

太:   我第一次聽玩角嘅人會講呢啲說話，如果你要買一件角十全十美嘅角，你買件假角囉？你明天攞返黎我俾番錢你，不過你以後唔好再係我舖買嘢。邊有買野係要十全十美？除非你要求攞上黎四面八方睇晒，價錢亦唔同。你買野咁怪，昵的係natural野，我就冇望過，就算望到你都係心甘情願買嘅。你想十全十美就去買件膠，我都話換番錢俾你。

(買果時三面我都睇得好耐好清楚，唯獨背面睇唔到，因為件角背面倚在石上，我嘅提出係冇話要攞番錢，你換過一件或下次買角時你話平少少我都覺得你有誠意，你仲叫我唔好再去你舖買野，仲話我要件十全十美，我都覺得你真係野蠻，畢竟我都幫襯過你不少。之前都聽過你對伙計講其他客齋睇唔買，宜家真係睇到你真面目。)

我:  我唔係話十全十美嘅問題，基本上你知道先至擺果邊，我唔信你冇睇過，你收得咁嘅價錢應該有番佢嘅價值，件角斷得多同比較完整都唔同價啦，老闆！顧客永遠想要買到佢應為價值嘅野，無論係貴或平，呢個係消費者的選擇。

太:  你Ya 啦， 我知道到我就唔賣俾你啦 ，我百幾件角件件去睇呀？你咁樣黎屈我，你有病呀，黐X線！

(我相信你放件角落缸都會睇過點放掛，又或者你幫我包果時冇理由睇唔到。之前我同某間珊瑚舖買件角，老闆見件角狀態唔好就叫我唔好買，呢啲咪職業道德囉。一講都唔駛唔駛發爛渣嘅！)

太:  唔該收聲啦，聽日攞番件角返黎，我知呢件角咁擺先好睇，阿八！

我:  你親自擺上去居然話冇睇過點擺？我真係唔信！

太:  你唔好咁多癈話，聽日攞番黎，四百幾元唔該呀乞衣！

(其實我覺得你誠信有問題先至講啫，大大話話都幫襯咗你成萬元，區區果四百八元我都冼得起，係時候叫番你做乞衣，睇你頂到幾時！)

JohnnyWong

咁都得😰退返錢都好公道 唔駛叫乞兒掛 做生意唔係咁做既 好言相向嘛

yinsiu

算拉，當買個教訓下次睇清楚

chihim

甘樣其實又無必要同個客交代啵。。 都唔係燒

不過老闆態度極惡劣又真既

nickdo

角呢D好平常.... 唔覺有問題...

大哥，呢啲唔係叫燒喎，燒係雪白色，係大自然枯萎，佢壓住生長引致，你係          咪初玩？啲邊全部埋晒口，唔係我個缸燒㗎。

其實佢講得啱, 野生D野點話得埋... 相信來貨已經係咁,


但待客態度又另一回事...

pacificworkshop

已上是昨晚電話對話的最後段，9:0x pm.

pacificworkshop

在回家開車路上，以解釋珊瑚情況，亦叫客人帶回來退款，
但客人不停說故意騙他。相為此珊瑚的背面，已生紫苔，亦已结邊，相信是底部，
在海時此面是貼著石面或骨支而生長。

肥嘟嘟河馬仔

睇相件鷹爪都無乜野，店舖都講左可以退返錢，一人行一步都算解決左件事。

ybkwok

如果買魚可以死左肯退錢就好啦

畢畢

睇清楚無燒樓主衰左

dicky826

粗口待客

qqkkfish

佢個珊瑚缸成缸鬼爪, 從來5敢幫襯

eeepchow

我上次買兩件，有一件睇漏係後面燒左一隻角，都廢是羅反去，唔再幫襯算!!

ybkwok

個人意見：
若果唔係收埋件貨，唔俾你睇，
仲要迫你買既話，究竟責任誰屬？

twice

算把啦，佢d價海鮮到呀，又成日叫你買哩件買𠴱件。我依家入都費事入呀！

畢畢

輸打贏要你地唔係睇清楚先買

alvin2008

其實想咩嘢都會係咁 買之前睇清楚 返到屋企先知錯 想退貨就難囉 除非大鋪 但價錢又會貴D 所以我覺得唔可怪晒鋪頭 買魚買角都話可以睇 買器材重慘 買個造流話超靜 點知.... 打去問吓會唔會自己set錯 答案係"要靜去買MP40啦"

傻傻地單眼仔

ice28720

都係果句！在店舖買野或約魚友交收，始終都是要睇清楚先比錢，有問題當面問清楚咁就少掙拗架啦。

Hanggor

昨晚第一次幫趁, 老闆都無乜野呀, 仲肯提點下我呢D新手