新手 買魚

小魚毛

好難想像樓主會認為上網睇片買魚好過親身去舖頭落手揀。

呢個應該唔係新手定老手買魚o既問題，而係新生代習慣網購同老餅習慣親身去買嘢o既代溝問題。

首先我唔信單靠一條片就可以睇到條魚o既狀態，除咗外形、泳姿、活潑等狀況外，魚身厚簿、魚旗魚身有無崩花斑點、會唔會啄玻璃搵食、同其他魚甚至係人o既互動⋯⋯呢啲都係睇片好難睇到。

至於話舖頭畀唔畀你揀魚，其實應該只係個別舖頭o既問題。揀咗魚之後畀你喺兜仔再三確認，呢個應該係所有魚舖客人o既基本權利，你未畀錢都絕對有權say no ；如果連揀都唔畀，咁就去過第二間啦，成條魚街咁多魚舖（呢個就係魚街存在o既價值）。個別舖頭或者一啲貴價啲o既魚，客人仲有權要求試餵；我更加試過有魚舖叫我唔好親幫襯佢買嗰批魚住，話批魚啱啱返，仲未養定⋯⋯呢啲都係屬於魚舖服務o既一部份，但都要成本代價，問題只係魚友覺得值唔值。魚街好多魚舖o既做生意手法啲確好多陋習，老點劏客根本係慣例，佢地買少見少一定程度都可以係話咎由自取，但唔通網購就唔會有呢啲問題？如果無晒魚舖，全部轉晒網購，咁肯定係魚友o既損失。

小魚毛

樓主網購o既成功經驗，我敢肯定一半係因為你買咗條人工魚，人工繁殖o既魚己經適應人工環境&飼料，要佢開口根本無難。

至於你嗰條所謂檸檬，其實係魔魚（雀鯛科），非常粗生（所以咁平），要養死佢都有一定難度；不過都要小心，魔魚養耐咗就會變惡爺，之後再加新魚都會畀佢打餐死，你要有定心理準備。

小魚毛

樓主個缸好似仲有火柴珊瑚&串串草，咁呢個就唔係純魚缸（FOT）咁簡單，而係珊瑚缸（RT）或者混養缸，你要有水冷、照明、高效過濾系統⋯⋯如果無或者唔打算買，咁就建議你唔好再放咩軟體生物落去，就咁養魚就算。

海洋生命係極之脆弱，雖然一條魚o既價值始終有限，但要養好佢o既難度不下於貓狗，要搵養魚o既資訊，建議你唔好只係喺Facebook問人，然後被動咁等人覆。好似呢個網站就好多置頂o既好料，值得你慢慢研究，再唔係用關鍵字喺Google search 下。