RT開缸問題

小魚毛

器材配搭呢家嘢，無話死緊，主要都係睇o下玩家點玩法。

珊瑚骨舖缸底，最大問題係容易積垃圾，會快好多就反缸。其實咩缸都有機會反，差別在時間問題：清缸底最穩陣，隨時玩你十年八年；沙底視乎厚薄，一般都幾年貨仔；珊瑚骨最快，兩年唔反算你好彩。當然，仲要睇翻你個缸o既各項環境因素，生物數量、餵食量，決定垃圾生產積聚量，但如果缸底有足夠水流，又可以幫手帶走啲垃圾，延長反缸週期⋯⋯

我硬頸，玩RT堅持落沙底，代價就係每年起石洗沙，如果你唔介意每年清缸起石洗珊瑚骨一次咁樣玩法，咁都無話死緊。不過我洗沙有洗沙器，簡單啲，珊瑚骨就無得咁玩，惟有抽出呢手洗（一定要用鹹水洗！！！），值唔值得咁玩，你自己考慮。

我見你個缸好似有多一層底板，係咪「簡易抽」設計？留意，單憑斜板o既設計，唔足夠帶走啲垃圾，除非你可以「晾」起啲石，喺石底下再造一層水流，咁就可以帶走所有垃圾，否則o既話，就咁斜底加珊瑚骨，唔會係一個穩定同有效o既系統。

以過濾功能呢講，珊瑚骨o既功效其實非常有限，就算畀你成功用到落濾筒，就咁加埋氣木化氮同幾件生物石，呢個缸o既硝化系統都唔會強，相信只可以勉強玩到少量軟嘢。而家咁多RT濾材，你可以再研究o下。