白點

laulau

arfaifai 發表於 2020-1-7 17:13
1) 白點相信魚有免疫
2) 不傷魚既銅藥
3) 溫度至28度

第2、3點同意係誤傳, 但第1點有保留, 因我魚缸生過白點嘅魚, 都好少再生白點, 即使間唔中出咗幾點, 亦好快好番。

我冇Q缸, 主缸有底砂、生物石, 好難杜絕蟲害。剛開始養魚時好緊張, 見有魚爆白點, 就用盡方法去醫, 落藥係最笨方法, 用過藥嘅魚九死一生, 反而唔理佢生存機會係一半一半。

而家我將魚生白點當係人類出麻疹, 每條新魚通常喺落缸一兩個禮拜內會爆一次白點, 我做法係白點出現前嘗試令佢地盡快開口, 食多啲嘢, 增強抵抗力, 因佢地白點最厲害時, 係冇胃口食嘢。生白點前仍未開口嘅, 多數都捱唔過去。夠強壯嘅魚, 喺白點生到成身都係時都唔會死, 過咗呢個危險時期, 白點會喺幾日內唔見晒, 從此就可以健康快樂過日子。

每次應只放一條新魚落缸, 唔好同時放兩條或以上, 這樣可避免宿主多而令白點蟲數量暴增, 否則其中一條染白點嘅新魚死咗, 白點蟲會集中攻擊另一條染白點嘅新魚, 後者原本也許可以捱到過去, 都因為白點增長太快而頂唔順。

至於其他已"出過疹"嘅魚, 好少會因新魚帶白點而受大規模感染, 除非水質太差。通常喺新魚爆白點時會見到啲"免疫"嘅舊魚身痕, 經常擦身, 或會局部出少量白點, 但係啲白點好快會唔見。


等新魚平安過咗"出疹"期, 大約隔兩個禮拜, 當舊魚都唔再擦身時, 先至好再加另一條新魚。