用海水養有咩要主意

小魚毛

有新鮮海水，當然好過玩鹽，慳錢又還保。

不過樓主都要搞清楚先，你個海水供應商o既取水源頭喺邊先？係咪次次都同一地點？喺碼頭邊，定係遠離市區或岸邊o既水域？水務處抽取海水沖廁o既源頭都係遠離污染o既水域，所以如果你o既海水供應商只係喺避風塘邊抽水呢用，咁就真係用廁水好過。

海鮮應該比珊瑚魚可以忍受更高o既水質污染，法例規定海鮮檔只要裝UV殺菌燈就夠，所以我相信UV燈都應該係你o既基本設備。如果想穩陣就加棉加碳過濾。

另外都要習慣每次換水前驗一驗新水。頭幾次最好驗o下NO3同PO4係咪零，就知啲水源係咪安全可靠，驗鹽度睇o下會唔會因為天氣（落雨）影響濃淡，就可以知道啲海水係咪呢自近岸水域，過淡o既時候都要加翻啲鹽。Ph值亦都可以反映到啲水質有無問題，百零蚊支測試筆簡單又方便。

如果你啲水源質素高又穩定，就唔單只慳錢兼環保，玩魚玩珊瑚都會易好多，當然，相關o既設備同經驗，仍然唔少得。