海水領域 SeaFishZone

標題: 醫生蝦原來真係會醫白點病 [打印本頁]

作者: laulau 時間: 2018-10-8 20:15:00 標題: 醫生蝦原來真係會醫白點病

是咁的，上星期買咗一條三點白放落珊瑚缸，兩日之後發現佢出咗兩粒白點。據以往經驗，無論用乜嘢藥點醫條魚，都係九死一生，於是決定先觀察多一日，再決定點做。

第二日朝早起身嚇一跳，條魚已生咗十幾粒，蔓延好快，於是我決定撈佢出嚟，打算到海邊放生，希望佢咁樣存活機會高啲。點知條三點白依然好精神，游得好快，捉佢唔到，為免搞亂珊瑚，只好放棄。

我個缸有一大一細兩隻醫生蝦，條三點白一路跟住隻大既，隻蝦亦不斷喺佢身上整嚟整去，到咗夜晚，啲白點好似小咗，但因為網上好多人都話醫生蝦唔食白點蟲，所以我以為只係錯覺。

再夜啲，隻大既醫生蝦似乎覺得煩了，盡管條魚不斷壓落佢度，佢都唔郁唔做任何嘢，呢個時候，條魚又游去跟住隻細蝦求醫，細蝦都好勤力咁喺條魚身上好似大力掹嘢出嚟。我都唔期望有神跡，只想等條魚再嚴重啲，冇晒力氣時捉佢出嚟，以免惹到其他魚，

點知第二日起身，真係喜出望外，只剩一粒白點，條魚繼續纏住醫生蝦，無幾耐連嗰粒都冇埋，條魚好生猛，好番後亦冇再纏住啲蝦

我冇落過任何藥、冇做任何嘢，啲白點蠱亦冇可能咁快成熟脫落，唯一可解釋既，就係醫生蝦幫佢捉咗啲蟲。當然，如果唔係條魚咁竭而不捨、死纏難打去求醫，隻醫生蝦可能只會敷衍兩下，唔會幫佢捉晒啲蟲

作者: WICKY276 時間: 2018-11-9 12:19:21

Me too. Good!!
I feeding 3 doctor shrimp in tank.

作者: yurilau 時間: 2018-11-24 18:13:43

我D醫生蝦會等條魚生白點死左後, 食佢條屍...

作者: knec0412 時間: 2018-11-26 13:20:27

yurilau 發表於 2018-11-24 18:13
我D醫生蝦會等條魚生白點死左後, 食佢條屍...

我果隻都是

作者: nickcw 時間: 2019-3-22 14:04:32

歡迎光臨海水領域 SeaFishZone (http://www.seafishzone.com/)